Dungog mipaundang ni Quilatan sa Summit Fight Night Amateur Boxing

CEBU, Philippines - Naghaguros nga mga kinumo ang gibuhian ni Ryan Dungog aron paundangon si Richard Quilatan sa ilang sangka sa Summit Fight Night Amateur Boxing series atol sa Kadaugan sa Mactan sa miaging gabii didto sa Mactan Shrine sa Lapu-Lapu City.

Nakigsinukliay pa si Quilatan og kumo ni Dungog sa first round, apan wala na kini makasustiner sa nagpiti-piti nga suntok sa naulahi ug nagkapuliki sa pagpanagang nga maoy nakapaaghat sa referee pag-undang sa away 1:41 sa second round.

Sa laing sangka, ang taga-Talisay City nga si Marvin Pumar midaog pinaagi sa puntos batok ni Vicente Seos-e Jr. sa Cabancalan Elementary School, ug si Richard Rama sa Phil-Aus Boxing Club midaog pinaagi sa decision batok ni Kevin Nemenzo sa Escalante City.

Ang teammate ni Seos-e nga si Polid Banal mikulata ni Mervin Lulu.

Mokompleto sa mga midaog mao sila si Richard Barrios batok   Christian Bacolod, Rolando Lingaw-Lingaw batok Raul Yu, Gerald Suico batok Marvin Cordova ug Nelson Sandal batok Raffy Bauna. (BANAT SPORTS)