Tinuod nga Garcia away sa Pinoy pride 14

CEBU, Philippines - Maayong balita. Natuman gyud ang pangandoy sa ALA Promotions nga madala dinhi sa nasud ang tinuod nga Genaro 'Poblanito' Garcia, apan ang dili maayong balita kay dili si Rey 'Boom Boom' Bautista ang iyang sangkaon.

Gikompirmar ni ALA Promotions president Michael Aldeguer nga moaway dinhi sa nasud ang kanhi Mexican world title challenger nga si Garcia, apan ang iyang kontrahon mao ang rising prospect nga si Genesis 'Azukal' Servania.

Ang Garcia-Servania showdown maoy supporting bout sa WBO light flyweight title defense ni Donnie 'Ahas' Nietes batok ni Mexican Felipe Salguero sa main event sa "Pinoy Pride 14" sa Hunyo 2 didto sa Resorts World Hotel and Casino sa Manila.

Si Garcia usa ka dekalibreng boksidor diin miaway kini og world title sa makatulo ka higayon batok   ni WBC champion Toshiaki Nishioka, Luis Alberto Perez ug Hozumi Hasegawa.

"It’s confirmed. We have received through international agent/matchmaker Sampson Lewkowicz the signed contract of the real Genaro "Poblanito" Garcia to fight Genesis Servania on June 2 in the undercard of Nietes," matud pa ni Aldeguer.

Matud ni Aldeguer nga si Servania ang moaway ni Garcia tungod kay dili mosugot ang Mehikano nga mosaka sa 126 lbs. nga maoy timbang ni Bautista.

Si Garcia unang gitupo sa ALA Promotions nga moaway ni Bautista niadtong Marso 3 didto sa Bohol, apan nabulabog ang maong fight card dihang usa ka impostor nga si Genaro Garcia ang miadto sa Bohol aron sangkaon ang ALA boxer.

Ngil-ad ang resulta sa away dihang nakita kun unsa kabanga ang peke nga Garcia, kinsa gipahunong ni Bautista sa second round.  (BANAT SPORTS)