Fazekas nagbida sa panalo ng Beermen
MANILA, Philippines - Sinandalan ng San Miguel Beermen ang husay ni Nick Fazekas sa huling yugto upang kunin ang mahigpit na 68-64 panalo sa Jobstreet.com Singapore Slingers sa 3rd AirAsia ASEAN Basketball League (ABL) kahapon sa Ynares Sports Arena sa Pasig City.
Malamig ang laro ng Beermen upang maiwanan sila ng 10 puntos matapos ang unang minuto ng huling yugto, 46-56, bago nag-init ang 6’11 na si Fazekas na hindi lamang umiskor kundi humablot pa ng rebounds at bumutata ng mga buslo ng kalaban.
“I expect solid game from Nick and also with Duke because they are high caliber imports,” wika ni Beermen coach Bobby Ray Parks Sr.
Si Fazekas ang nanguna sa Beermen sa kanyang 23 puntos, 19 rebound at 3 blocks at 12 puntos, 8 boards at 3 blocks ang ginawa nito sa huling 10 minuto ng yugto.
Nakatulong din ang tres ni Leo Avenido na nalimitahan lamang sa walong puntos ng dating koponan, dahil ang buslong ito ang siyang tuluyang nagbigay ng kalamangan sa home team, 62-61.
Huling hirit ng Slingers ay ang malayong tres ni Don Dulay para itabla sa 64-ang iskor pero nagtulong sina Fazekas at Chris Banchero ay nagsanib sa sunod na apat na puntos ng Beermen para sa 68-64 kalamangan may 12 segundo sa orasan.
Si Banchero ay mayroong 13 puntos at 5 assists habang 11 puntos at 7 rebounds ang ibinigay ni Duke Crews at ang Beermen ay mayroon ngayong 5-game winning streak upang palawigin ang kapit sa liderato sa 15-4 karta.
- Latest
- Trending
