Team Echo mipakaging sa Alpha 5

CEBU, Philippines - Gipakuratan sa Alpha Team ang solo leader Echo quintet pinaagi sa pag-iskor og 74-69 nga kadaugan kaniadtong Sabado sa gabii alang sa ilang ikatulong daog sa nagpadayong elimination round sa Center Katipunan A. Lopez Christian Organization (CEKALCO) 2012 summer basketball tournament didto sa sitio A. Lopez open court sa barangay Labangon, ning dakbayan.

Ang Alpha kinsa nakahimo'g 14 puntos nga abante, 59-45 sa wala pa kini maapas sa ilang kontra, aduna nay 3-4 nga baraha samtang ang Echo aduna'y 5-3 nga baraha ug mao gihapo'y nag-una bisan pa napilde sa miaging gabii.

Padayong giproteksiyonan sa Alpha ang ilang labaw pinaagi sa paningkamot sa ilang sentro nga si Edward Tenchavez kinsa maoy nangu sa opensa pinaagi sa iyang 20 puntos.

Miskit ang Echo didto sa fourth period dihang nakamaneho sila'g 25-15 nga rally ubos sa pagtimon nilang Nolet Tabasa ug Kenneth Beltran apan dili kadto igo nga masakmit nila ang labaw tungod kay nakapundo na og daku-dako ang Alpha.

Giabagan si Tenchavez ni Dodong Sinag kinsa miamot og 15 puntos samtang sila si ug George Aspera ug Mimi Dolera nagkumboya og 25 puntos.

Si Tabasa mihakot og 23 puntos aron pangulohan ang Echo ug midugang si Kenneth Beltran ug 15 puntos.

Sa laing duwa, midaug ang Delta batok Charlie, 86-76 aron pagpalambo sa ilang baraha ngadto sa 4-4 samtang ang Charlie midailos ngadto sa 3-5 nga baraha.

Miposa og 34 puntos si Julius Gutierrez alang sa Delta ug midugang si Edwin Lazaga ug 24 puntos samtang si Tiks Bacho maoy nangu sa Charlie sa iyang 23 puntos ug parehong mihipos og double figures silang Marvin Ensong ug Don Elmido alang sa Charlie.

Puntos matag usa:

First Game:

ALPHA (74)- Tenchavez 20, Sinag 15, Aspera 13, Dolera 12, D. Panugaling 5, Sirena 5, Perino 4.

ECHO (69)- Tabasa 23, Beltran 15, Templa 12, Da. Desoyo 11, Cabalda 8.

Second Game:

DELTA (86)- Gutierrez 34, Lazaga 24, Ho 7, T. Loayon 6, Yamo-ay 5, Bello 2, Rosales 2.

CHARLIE (76)- Bacho 23, Ensong 16, D. Elmido 15, Lanticse 8, Salaber 8 (PR/GGM)  (BANAT NEWS)