Macahilig nasugamak ni Diale

CEBU, Philippines - Usa ka makapakurat nga seventh round KO ang gihimo sa beteranong si Arden Diale ngadto sa ALA prospect nga si Mhar Jhun Macahilig aron masakmit ang Philippine Games and Amusement Board (GAB) flyweight belt sa main event sa Cobra Energy Drink “Tunay na Lakas Boxing” sa miaging gabii didto sa Bay Center sa Bacolod City.

Si Macahilig giisip nga usa sa mga umaabot nga rising star sa ALA Promotions apan wala siya musalir sa kanhi world title challenger nga si Diale.

Naglabaw si Macahilig sa scorecards sa mga judges, apan gamit ang usa ka bangis nga hook sa apapangig, gipatug ni Diale si Macahilig sa ika-29 segundos sa seventh round.

Ang Sarangani Province boxer nga si Diale mipalambo sa iyang record ngadto sa 18-6, 5KOs, samtang si Macahilig nakahiagum sa iyang ikaduhang pilde sud sa 16 ka away.

Sa supporting bout, gipahayang usab ni Mark Acub si Rocky Sismundo, samtang gitumba ni Arjan Canillas si Hagibis Quinones. Gipaundang ni Reymund Tabogon si Dingdong Quinones sa second round.

Mokumpleto sa lista sa mga midaog mao sila si Louie Arlos batok ni Bryan Inojales ug Marlon Macayan batok sa Hapon nga si Takaoki Noma.  - (BANAT NEWS)