Gonzales mangu sa 19 Cebuano qualifiers sa National Age-Group Chess Championships

CEBU, Philippines - Garbo sa Danao City nga si Alphecca Gonzales ug laing 18 ka Sugbuanong chess players ang miabante ngadto sa grand finals sa 2012 National Age-Group Chess Championships human maghari sa ilang tagsa-tagsa ka dibisyon sa Visayas qualifying tournament kagahpon didto sa Gov. Corazon L. Cabagnot Tourism and Training Center sa Kalibo, Aklan.

Mokuyog nila ang laing top qualifiers gikan sa Luzon ug Mindanao sa national finals nga gikatakda sa Abril 23-30 didto sa Tanauan, Batangas.

Ang overall champion makaangkon og luna alang sa 2012 Asian Youth Championships karong Hunyo 23-30 sa Sri Lanka.

Sa tanang Cebuano qualifiers, bugtong si Gonzales lang ang nakaangkon og katungod nga morepresentar sa Pilipinas alang sa 2012 ASEAN Age-Group Chess Championship sa Hunyo 10-20 didto sa Hue, Vietnam human manghawod sa girls 8-under division.

Sila si Jasia Dorog sa Cebu City, Regina Catherine Quiñanola sa Malabuyoc ug Vladimir Robillos sa Mandaue City mi-okupar sa nahabiling luna sa nahisgutang kategoriya.

Si Allan Pason mipahiluna sa ikaduha sa 16-under category. Ang laing qualifiers mao sila si Jazelle Villarin sa University of San Carlos (USC), Felix Shaun Balbona sa Cebu City ug Diego Abraham Claro sa Mandaue City.

Sila si Vic Glysen Derotas sa USC, Cherry Mae Caballes sa Cebu City, Chris Aldritz Pondoyo sa University of Cebu (UC), James Andrew Borgonia Duane sa Brgy. Guba nasulod sa 12-under division. Ang lain pang qualifiers naglakip nilang Glesit Marie Tatoy sa San Fernando ug Jeremy Pepito sa USC sa 10-under, Rhenzi Kyle Sevillano, Ryan Pacris ug John Francis Balbona sa 14-under ug Jessa Marie Balbona sa 20-under.  (BANAT SPORTS)