CEBU, Philippines - Gisibog ang petsa sa labing unang title defense ni interim IBF light flyweight champion Johnriel Casimero gikan sa Mayo 13 ngadto sa Hunyo sa wala pa matinong binyu.
Si SGG Sports Promotions big boss Sammy Gello-ani nagkanayon nga ilang gisibog ang petsa tungod sa WBO flyweight title defense ni Brian Viloria batok ni former Mexican champion Omar Nino Romero sa Mayo 12 didto sa Ynares Sports Arena.
Si Casimero gitakda nga modepensa sa iyang bakus batok sa Mehikanong si Sammy ‘Gutty’ Gutierrez ug nagtuo si Gello-ani nga pagsibog sa petsa makaayo sa duha ka boxing event.
“Ma-conflict man gud ug dili ko gusto nga ma-affected ang akong promotion kay daku nga event ang title defense ni Viloria,” matud pa ni Gello-ani. “Pero mas makaayo sad nga akong isibog ang promotion para usab sa mga boxing fans.”
Miingon si Gello-ani nga lakip sa iyang gipilian nga venue mao ang Waterfront Hotel ug Hoops Dome sa Lapu-Lapu City .
Si Casimero misakmit sa IBF title niadtong Pebrero 11 batok sa Argentinean nga si Luis Lazarte pinaagi sa 10th round TKO didto sa Argentina .
Nabaniog ang maong away sa tibuok kalibutan sa boxing dihang usa ka riot ang miulbo diin biktima ang Team Casimero sa mga naglungot-lungot nga Argentinean fans. - BANAT NEWS