Mata midominar sa Madridejos chessfest

CEBU, Philippines - Midaog si Gerold Mata pinaagi sa puntos batok ni Aldrin Bacolod ug misakmit sa titulo sa open division sa Alfonso Dondon Sr. Memorial Chess Tournament niadtong miaging adlaw didto sa Madridejos town hall sa lungsod sa Madridejos sa Bantayan Island.

Sila si Regelito Hortillano, Ramon Gidayawan, Wentex Santillan ug Deomedes Pacifico maoy mikompleto sa top six winners.

Sa high school level, si Elaila Mae Monsalud mikabkab og bulawan dihang iyang gipilde silang Juvy Caratao ug Jason Rey Sarabia nga maoy mi-okupar sa ikaduha ug ikatulo nga dapit. 

Samtang sa elementary division, si Jethro Benedict Pacifico maoy mipatigbabaw, gisundan nila ni Joshua Bacolod ug Ellah Mae Gervacio.

Mga ganting salapi, medalya ug certificates of recognition ang nadawat sa mga mananaog sa torneyo nga nahimong posible tungod sa   suporta nila ni Edwin Monsalud sa Regional Bureau of Jail Management and Penology (RBJMP)-Bantayan District Jail ug LA Madridejos-USA International Group.

Gawas sa chess, lain pang sporting events sa Madridejos Summer League 2012 naglakip sa mountainbike, volleyball, basketball, soccer ug table tennis.

Si Johnny Sevillejo maoy mikampiyon sa mountainbike race uban sa iyang mga runners-up nga sila si Erwin Paras ug Arnel Paras.

Ang volleyball event, ang Salazar Colleges of Science and Institute of Technology (SCSIT) Spiking Skyblazers miangkon sa una ug ikatulo nga dapit   samtang ang Go Girls sa Brgy. Patao misakiyo sa second place trophy.  (BANAT NEWS)