Agawan sa game 1

MANILA, Philippines - Habang nagrerelaks ang mga semifinalists nang Talk ‘N Text at Barangay Ginebra, apat na koponan naman ang mag-aagawan para sa dalawa pang semifinals berth.

Magtatagpo ang No. 3 B-Meg at ang No. 6 Meralco ngayong alas-6:30 ng gabi matapos ang salpukan ng No. 4 Alaska at No. 5 Barako Bull sa alas-4:15 ng hapon sa kani-kanilang best-of-three quarterfinals series para sa 2012 PBA Commissioner’s Cup sa Smart-Araneta Coliseum.

Ang nagdedepensang Tropang Texters ang umangkin sa No. 1 ticket, habang napasakamay ng Gin Kings ang No. 2 seat matapos talunin ang Llamados, 93-84, sa kanilang playoff game noong Biyernes.

Ang mananalo sa quarterfinals series ng Alaska at Barako Bull ang sasagupa sa Talk ‘N Text sa best-of-five semifinals wars, samantalang ang mananaig sa pagitan ng B-Meg at Meralco ang makakalaban ng Ginebra.

Tinalo na ng Llamados ang Bolts, 96-93, at binigo ng Energy ang Aces, sa kani-kanilang unang pagtatagpo sa pagbubukas ng torneo noong Pebrero 10.

“It’s all about bouncing back and refocusing,” sabi ni B-Meg head coach Tim Cone sa nasabing pagyukod nila sa Ginebra.”

Ito ang rematch ng B-Meg at Meralco makaraang manaig ang Llamados, 2-0, sa kanilang best-of-three quarterfinals showdown sa 2012 PBA Philippine Cup.

Sa unang laro, ipapa­rada naman ng Barako Bull ang bagong import na si 6-foot-10 Chukwu­nike ‘Reggie’ Okosa na pu­malit kay Rodney White, umuwi sa United States kamakailan para makasam a ang ama niyang may malubhang karamdaman.

Nanguna si White sa scoring sa torneo mula sa kanyang 29.8 points per game average para sa Ener­gy ni Junel Baculi. Nagtala din siya ng mga ave­rages na 13.2 rebounds, 5.8 assists at 1.2 steals.

Para naman makasagupa sa quarterfinals ang Barako Bull, kinailangang talunin ng Meralco sa playoff ang Powerade, 102-98, noong Biyernes.