Kontrang Banal RD.1 RA

CEBU, Philippines - Yanu ra kaayong gidispatsar ni world title contender AJ ‘Bazooka’Banal si Mexican Raul ‘El Bule’ Hidalgo aron depensaan ang iyang WBO Asia-Pacific bantamweight title sa main event sa "Pinoy Pride XIII:Road to Glory" sa miaging gabii didto sa Waterfront-Cebu City Hotel and Casino.

Usa ka nagpungasi nga left-hook ang gibuhian ni Banal (27-1, 20KOs) nga maayong pagkatugpa sa suwang ni Hidalgo (16-6, 12KOs) kinsa mibarag ug daw wala na makakontrol sa iyang lihok.

Tungod niini si international referee Danrex Tapdasan daling mipatunga ug miundang sa away sa 2:29 sa first round aron malikayan nga matiwasan pa ni Banal ang naglipung-lipung nga si Hidalgo .

“Akong nakita nga ang boxer ( Hidalgo ) nagrabehan gyud tungod kay mikirig gud siya ug bisan og nagbarug pa ako nalang gihunong ang away kay delikado man sad og mausban pa ni Banal,” matud pa ni Tapdasan.

Miangkon hinuon si ALA Boxing Gym big boss Antonio ‘Bidoy’ Aldeguer nga nabitin siya sa away, apan dili niya mabasul ang referee ug alang kaniya mas importante ang kaluwasan sa boksidor.

Wala hinuon panumbalinga ni Banal kun sayu nahuman ang away tungod kay ang importante alang kaniya mao nga iyang napakita nga andam na siya alang sa world title. “Wa ko ga-expect nga sayu mahuman ang away pero nalipay ko kay napakita nako nga andam nako.”

Sa iyang bahin, si ALA Promotions CEO Michael Aldeguer mitug-an nga naghuwat pa sila sa hukom ni WBO bantamweight champion Jorge Arce kun ibakante ba niini ang iyang bakus.

“We’re waiting for Arce’s decision. He will fight on June 9 in Pacquiao undercard so we will see if he will vacate or defend his bantamweight title,” matud pa niya. “Differently a world title fight for Banal will happen this year.”

Sa supporting bout, gipatug usab ni OPBF flyweight champion Rocky ‘The Road Warrior’ Fuentes (33-6,20KOs) ang Mehikano nga si Franco Chivero (19-7, 10KOs) sa sixth round, samtang si ‘Prince’ Albert Pagara (11-0,9KOs) mipahayang usab sa Thai nga si Phupha Por Nobnom (10-8, 9KOs) sa second round.

Midaog usab si Arthur ‘El Matador’ Villanueva (18-0, 12KOs) pinaagi sa unanimous decision batok ni Rey Migreño (15-19, 13KOs) sa La Trinidad , Benguet.  - BANAT NEWS