Bronze Sa Pinay Boxers

ULAAN BAATAR, Mongolia - Nagkasya na lamang sa bronze medal sina flyweight Alice Kate Aparri at bantamweight Nesthy Petecio ng PLDT-ABAP Na­tional Team matapos matalo sa kani-kanilang semifinals matches sa 6th Asian Women’s Boxing Championships dito sa Buyant Ukhaa Sports Pa­lace.

Yumukod si Aparri kay five-time world champion Mery Kom ng India, 6-21, sa flyweight division mula na din sa pananakit ng kan­yang tiyan at sobrang ka­paguran.

Ito ang unang kabiguan ni Aparri ng Baguio City matapos ang tatlong sunod na panalo sa torneo.

Sinamantala ni Kom, sinuportahan ng mala­king Indian contingent, ang masamang pakiramdam ni Aparri papunta sa gold medal round.

Natalo din si Petecio sa kaniyang semifinal match kay Keija Luo ng China sa bantamweight class ma­karaang malasap ang 5-10 kabiguan.

Tig-pitong boksingero ang naipasok ng India at China sa finals sa 10 weight classes.

May tig-dalawang fina­lists ang host Mongolia at Kazakhstan at may tig-isa naman ang Tajikistan at Thailand.