Banal modepensa sa iyang bakus

CEBU, Philippines - Ipabuhagay na ni AJ 'Bazooka' Banal ang tanan niyang kusog dili lang aron manalipod sa iyang WBO Asia-Pacific bantamweight title, apan aron usab maseguro ang iyang kahigayonan alang sa world title fight karong gabii sa main event sa "Pinoy Pride XIII: Road to Glory" diha sa Waterfront Cebu City Hotel and Casino.

Si Banal (26-1-1, 19KOs) modepensa sa iyang bakus batok sa Mexican challenger Raul 'El Bule' Hidalgo (16-5, 12KOs).

"Importante gyud ni nga away nako. Kinahanglan mopakita ko og nindot nga kadaugan," matud pa ni Banal, kinsa nakakuha og 118 lbs. weigh-limit atol sa official weigh-in kagahapon didto sa Event Centre sa SM City- Cebu.

"Akong ipagawas ang tanan nakong abilidad kay nagdepende akong kaugmaon ning awaya. Andam ko bisan knockout pa o decision basta modaog ko."

Sukwahi hinuon kini sa nahitabo ni Hidalgo kay kinahanglan pa nga maghubo tanan kay milapas kini og usa ka libra. Si Hidalgo igo na lang gitabilan og tualya aron lang makuha ang weight-limit.

Sa iyang bahin, si ALA Promotions CEO Michael Aldeguer nagkanayon nga kini ang labing dakung away ni Banal sa dili pa siya motikang sa sunod nga ang-ang sa world championship.

"This could be Banal’s biggest fight before he gets to the next level of world championship. This will be his last ticket to another world title shot. That’s how significant is this fight for him," matud pa ni Aldeguer.

Sa supporting bout ning mega-boxing show nga gipasiugdahan sa ALA Promotions ug ABS-CBN Sports, si OPBF flyweight champion Rocky 'The Road Warrior' Fuentes (32-6-2, 19KOs) moharong sa labing una niyang Mehikanong kontra nga si Javier 'El Chivero' Franco (19-6-1, 10KOs).

Moaway usab ang mga undefeated ALA fighters nga sila si Albert 'The Prince' Pagara (10-0, 8KOs) ug Arthur 'El Matador' Villanueva (17-0, 12KOs) batok nila ni Thai Phupha Por Nobnom (10-7, 9KOs) ug Rey Migreño (15-18, 13KOs) sa La Trinidad, Benguet.  (BANAT SPORTS)