CEBU, Philippines - Maghugop na usab ang mga bantugang cowboys lukop nasud dinhi sa Sugbu aron ipakita ang ilang abilidad sa pangabayo sa 5th Governor's Cup Horse Show and Competition sugod karong adlawa.
Ang tulo ka adlaw nga kompetisyon nga gipasiugdahan sa Cebu Equine Owners, Breeders and Sportsmen Association (CEOBSA) apilan sa mga mananaog sa miaging tuig nga North and South qualifying races sa probinsiya sa Sugbu.
Gawas sa host CEOBSA ug sa Cebu Provincial Cowboys, ang lain pang mga partisipanting kahugpongan naglakip sa Davao Horse Club, Impasugong Horsemen Association, Cagayan de Oro City Horsemen Association, Bohol Horse Club, El Kabayo Equestrian Center of Clark, Pampanga ug Rodeo Masbateño.
Laing highlights sa kalihukan mao ang tartanilla decorating contest ug agro-trade fair.
Gipresentar sa probinsiya sa Sugbu ubos sa liderato ni Governor Gwendolyn 'Gwen' F. Garcia, ang kalihukan gisuportahan sab sa San Miguel Corporation, Jollibee, Coca-Cola, KIA Motors, Nature's Spring, Gatorade ug Holcim. (BANAT SPORTS)