CEBU, Philippines - Milansang sa ilang ikaduhang sunod-sunod nga daog ang Pajo National High School (PNHS), ning higayona batok sa host Davao City National High School sa 9th Shakey's Volley League Tournament of Champions kagahapon didto sa Davao City.
Ang Pajo belles sa giya ni coach Fr. Rolando T. Manayon, milupig sa Davao sud sa straight sets, 25-20, 25-22, 25-16.
Sa sayo pa, ang garbo sa Lapu-Lapu City miharos sa De La Salle-Lipa, 25-19, 25-19, 25-10.
Daku'g natampo sa kadaugan sa Pajo mao si multi-awarded Gretchie Soltones, Danica Yonson, Apple Rueles, Lovely Marie Murillo, Denisse Franciska Lim ug Jessa Jorquia.
Karong adlawa, ang Pajo moharong sa mas tag-as ug lig-ong karibal Hope Christian School, nga milupig sa Davao City National High School sud sa upat ka set niadtong Miyerkules, 25-15, 24-26, 25-17, 26-24.
Sa laing duwa, ang Holy Family Academy mimakmak sa Baguio City National High School, 25-16, 26-24, 25-20.
Ang top two teams human sa single round elimination magsangka sa crossover semis, diin ang mga mananaog mag-ilog sa korona ning maong kompetisyon nga gipaluyohan sa Toby's, Mikasa ug Asics. (BANAT SPORTS)