Dili matay-og nga kredibilidad

Usa sa akong mga hilig mao ang pagbasa ug pagkolekta og mga panultihon nga makinaadmanon. Kana bang gitawag nilang "words of wisdom." Mga mubo nga mensahe, apan adunay pagtulon-an nga atong mapanaminan sa inadlaw natong pagpakabuhi ning kalibotana.

Usa sa mga mahinungdanong pulong nga nakatatak na sa akong huna-huna ug dili na nako mahikalimtan mao ang gisulti ni Sir Jose 'Dodong' R. Gullas, ang Chairman of the Board sa The Freeman nga igsuong mantalaan sa Banat News, atol sa usa namo ka meeting lima ka tuig na ang milabay.

Bisan pa sa gidugayon sa panahon, wala mapapha sa akong alimpatakan ang gipaambit nga mensahe ni Sir Dodong. Mura kini og Haring Adlaw nga magsige og sidlak sa akong huna-huna. Matud pa ni Sir Dodong, "It will take you years to build your reputation, but it will only take a single minute for others to destroy it."

* * *

Pwerting saktoha gyud sa gisulti ni Sir Dodong. Kay ni bisan kinsa mahambin kini nato sa atong kinabuhi. Kay bisan unsa pa kadaghan ang kaayohan nga atong nabuhat sa atong isig katawo, kun makabuhat kita'g usa lamang ka sayop sagad mao kini ang mahinumduman. Tinuod, dili ba? Ang mas nakapait kun ikaw mabiktima sa maitom nga kahigayonan labi na sa usa ka tawo nga way konsensiya ug pagbati sa uban, kansang gipasulabi mao lamang ang pagtagbaw sa personal niyang interes ug motibo bisan pa'g nakahimo kini og daku'g kadaut sa iyang isig kaingon.

Mao nang misimpatiya ko sa gibati karon sa mga haligi sa ALA Promotions nga sila si Sir Tony Aldeguer ug sa iyang anak nga si Sir Mike. Kini tungod kay sa miaging semana nabiktima sila sa usa ka mangingilad nga Mehikanong matchmaker nga si Hugo Correa. Gustoon ko man sa pagsulti o dili, ang insidente nakamantsa sa imahe sa tinamod ug tinahod nga boxing promotions sa nasud.

* *

Dili maayo ang mag-akusa ug magsulti og dautan sa atong isig katawo, apan nakaingon ko nga usa ka mangingilad si Hugo Correa. Kagahapon, gipadad-an ko og mga mahinungdanong dokumento sa akong higala ug kababayan nakong Bantayanon nga si Chad Escario Cañares, ang special assistant ni ALA Promotions CEO ug President Michael P. Aldeguer.

Akong natino nga klaro kaayo nga ang gisabotan nilang Aldeguer ug ni Correa nga iparang ngadto ni Rey 'Boom Boom' Bautista sa away niini niadtong Marso 3 didto sa Tagbilaran City mao si Genaro 'Poblanito' Garcia. Apan unsa kahay nasud sa pahak ni Correa nga 'peke' nga Genaro Garcia man ang iyang gipadala sa Bohol. Ang nakaparat kay wala kini porma, overweight ug dili makamao manukmag nga gikadismaya og maayo sa mga nanan-aw.

Dili na lang nako tas-on pa pagsaysay ang nahitabo kay nasayod na man kitang tanan kun unsa mang matuod. Pong pa nila, "the damage has been done." Tinuod kana, apan daku ang akong pagtuo ug panglantaw sa unahan nga ang nahitabo dili makalup-og sa reputasyon nga gipanday sa ALA Promotions sud sa dul-an sa tulo na ka dekada.

Ang usa lamang ka sipyat dili makaduhig sa imahe sa ALA Promotions. Mas baga nga hut-ong sa katawhan ang nasayod kun unsa kaligdong ang ALA Promotions sa ilang pagpadagan ug dili na maihap nga mga boxing events, dili lamang dinhi sa Sugbu, apan lukop nasud. Segun pa sa laing karaan nga panultihon, "you can't put a good man down." Mao nang bisan unsa pang klase sa unos ug bagyo ang mohampak sa ALA Promotions, dili kini makatay-og sa kredibilibad nga ilang giprotektahan ug giampingan sud sa 25 na ka mga katuigan.

* * *

Congratulations diay ngadto sa University of the Visayas (UV) Passerelle team sa pagkabkab sa kampiyonato sa 16-under division sa ThreeSixty Pharmacy Cup 2012 niadtong Domingo diha sa City Sports Club-Cebu gym. Ilang gipilde sa finals ang Sacred Heart School-Ateneo de Cebu, 69-61. Mao kini ang labing unang higayon nga nanghawod ang UV sa Passerelle division dinhi sa Sugbu sukad kini miapil og mga age-group tournaments duha pa lang ka tuig ang milabay. Sa miaging bulan, ang UV mao sab ang naghari sa SBP Under-16 National Championships didto sa Baguio City. Ang duha ka higanteng kadaugan segurong makapadasig pag-ayo sa batan-on nilang team manager nga si Samsam Gullas nga palambuon pa ang developmental basketball program sa labing unang unibersidad sa Sugbu. Cheers kaninyong tanan!

* * *

Kun dunay mga komentaryo o reaksiyon, mahimong mo-email sa [email protected] o sa [email protected]