labing unang talisay triathlon gilusad

 CEBU, Philippines - Gilusad kagahapon ang labing unang Talisay Triathlon Race nga gikatakda karong Marso 25 nga manukad didto sa New Talisay City Fish Port ug moagi kini sa Cebu South Coastal Road.

Ang lumba usa sa mga highlights sa kasaulogan sa American landing ug magsilbe usab kini nga dry-run alang sa 2012 Ironman Philippines 70.3 karong Agosto.

Aduna kini tulo ka dibisyon, ang adult, kiddie ug relay.

Ang adult adunay lima ka age group categories ug kini mao ang 19-below, 20-29, 30-39, 40-49 ug 50 above, samtang ang kiddie mao ang 10-under, 11-12 ug 13-14.

Ang moapil sa adult division ug relay kinahanglan molangoy og 1000m, 30 kilometer bike ug 7.5km run, samtang ang kiddie participants mosubay lang og 300m swim, 8km bike ug 3km run.

"Naka-decide mi nga mo-organize og triathlon since mikusog karon pagbalik ang maong sports ilabi na nga ang Cebu maoy mo-host sa Ironman Philippines," matud pa ni Talisay City councilor Rodi Cabigas atol sa press conference kagahapon didto sa People’s Hall sa Talisay City Hall.

Ganting salapi, tropeyo ug tri-suit ang madawat sa top three finishers sa matag kategoriya.

Ang registration fee nagkantidad og P1,000 libre na ang finisher's medal, t-shirt ug recovery meal.

Mahimong magparehistro sa Talisay Sports Commission office, Runnr sa Ayala Center-Cebu ug Vicky's Marketing sa Tabunok, Manalili ug Naga branches.

Ang race kits makuha gikan sa Marso 19 hangtod sa 23 didto sa Talisay City Sports Commission Office.

Alang sa dugang mga detalye, mahimong mokontak ni Hazel Busa sa 0922-8677491 or 272-2755.  (BANAT SPORTS)