MANILA, Philippines - Hindi pa ikinokonsidera ni Dennis Orcollo ang sarili na kahanay sina Efren Reyes at Francisco Bustamante.
“Hindi pa,” wika ni Orcollo nang tanungin kung dapat na siyang ilinya sa dalawang tinitingala ng bansa kung paglalaro ng bilyar ang pag-uusapan.
“Sila Efren at Dyango matatag pa rin kahit may edad na. Talagang matibay pa at malaking bagay na naririyan pa sila dahil inspirasyon namin sila at lumalakas ang loob namin pag kasama sila sa tournament,” dagdag pa ni Orcollo.
Kinuha ni Orcollo ang ikalawang Athlete of the Year award nang parangalan siya nito sa idinaos na Philippine Sportswriters Association Annual Awards Night noong Sabado ng gabi sa Manila Hotel.
Sina Vice President Jejomar Binay kasama ni PSA President Rey Bancod ang naggawad sa kanya ng prestihiyosong tropeo sa gabi ng parangal.
“Talagang malaking karangalan na ako na naman ang mahirang na Athlete of the Year. Siyempre, masayang-masaya tayo dahil alam ko lahat ng atleta ay pinapangarap na manalo nito,” ani pa ng pool player na hinirang bilang number one player ng WPA noong nakaraang taon.
Ang ikalawang tropeo sa PSA ay magtutulak kay Orcollo upang magpursigi pa sa pagbibigay ng karangalan sa mga lalahukan niyang malalaking kompetisyon.
Hindi naging maganda ang simula ng 2012 kay Orcollo dahil nabigo siyang depensahan ang World 8-ball crown pero marami pang nakalinya at doon siya babawi.