CEBU, Philippines - Lain na sab nga kanhi basketball player ang milampos sa usa sa labing lisod nga kurso nga mao ang abogasiya o Law. Dinhe gipa-ila ni Atty. Kenneth Kernn Sesante nga ang usa ka basketball player makahimo pagbahin sa iyang oras aron molampos tungod kay bisan og lisod ang kinabuhi sa usa ka basketball player nga kanunay gikapoy sa practice ug sa aktuwal nga duwa, aduna gihapon siya'y oras sa pagtuon.
Si Sesante kanhi captain ball sa University of Cebu (UC) Webmasters kinsa iyang gitimonan ngadto sa 2005 Cebu Schools Athletic Foundation, Inc. CESAFI finals. Niadtong tuiga, wala hinoon sila molampos pagsakmit sa korona tungod kay napilde sila sa University of the Visayas (UV) Green Lancers ubos nilang Joseph Ronald Quiñahan.
Gitapos ni Sesante ang iyang playing years isip varsity sa UC nga walay korona sa CESAFI apan human sa iyang pag-gradwar isip player nga may kursong Customs Brokerage, siya maoy miguwang no. 2 sa board exam sa tibuok Pilipinas.
Karon lang bag-o, usa si Sesante sa mipasar sa bar exam sa miaging tuig ug karon hingpit na siyang abogado ug ang dili pa lang segurado karon kung andam ba siyang molaban sa mga kabus nga nagkinahanglan sa iyang serbisyo ilabi na sa iyang tagi-lungsod didto sa Boljoon.
Wala siya makasulod sa Top 10 apan matod pa ni Sesanrte igo na kaayong nakalusot siya tungod kay lisod ang maong bar exam nga gipahigayon didto sa University of Sto.Tomas campus sa miaging tuig.Gani wala may Sugboa-anon nga milandig sa top 10 karong tuiga.
Bisan og nakapabarug na siya'g usa ka Customs Brokerage business, wala gihapon mobiya og duwa'g basketball si Sesante ug aktibo gihapon siya sa mga minor tournaments ilabi na sa UC College of Law.
Dili lang si Sesante maoy kanhi basketball player nga nahimong abogado tungod kay daghang nakahimo niini sa miaging pipila na ka tuig ang milabay. Gani ang UV president nga si Congressman Eddie R. Gullas usa man sab ka kanhi basketball player ug coach pa gyud.
Mas daghan hinoon tingaling mga kanhi basketball players gikan sa University of San Carlos (USC) Warriors nga milampos ug nahimo sab nga abogado. Usa kanila mao si kanhi Supreme Court Administrator Justice Christopher Locke uban sab kanilang Atty. Danilo Deen, Atty. Baldomero C. Estenzo ug Atty. Celestino E. Martinez Jr., ang mayor sa Bogo, Cebu.
Lain Sugboanon nga bag-o lang mipasar mao si Jed Carlo Lazaga gikan sa University of San Jose Recoletos. Dalaygon sab kini si Lazaga nga akong nahibaw-an nga paisano diay nakong taga Camotes nga molupyo sa lungsod sa Pilar ug paisano sab sa Pilarnon nga si Ryan Mark P. Borinaga, ang editor sa Banat Hugyaw.
Si Lazaga maoy gitumbok nga suspetsado atol sa 2010 bar exam bombing incident didto sa Dela Salle University apan napamatud-an nga wala siya'y sala. Matod pa niya nga gusto siyang mahimnog abogado sa mga kabus aron iya kining panalipdan kay susama kaniya, biktima sa pasangil nga walay kamatuoran.
Sa akong pakisusi, adunay labing menos 126 ka bag-ong abogado nga mipasar gikan sa nagkalain-laing unibersidad dinhi sa Sugbo. Ang 54 (60 ang mikuha) gikan sa University of San Carlos (source Atty. Dandel Rose Villacastin, 30 ang gikan sa University of San Jose Recoletos (source Dioscoro Himotas), 12 gikan sa University of Cebu (source Atty. Baldomeco C. Estenzo), 13 ang gikan sa University of the Visayas (source Marichu Cabanilla), pito gikan sa Southwestern University (source Ryan Aznar) ug unofficial unom gikan sa University of Southern Philippines-Foundation (USP-F) sumala pa ni Atty. Divine Marcial-Flores, umaabot kolumnista sa Banat News.
Miscellaneous. I will be turning a year older on Sunday, March 11. Advance birthday greetings to my uncle Narsales Malagar of Poro, Camotes who is having his 83rd birthday celebration on March 9. Belated birthday greetings too to Mandaue City vice-mayor Glenn O. Bercede last Saturday, March 3 in coincidence with the SAC-SMC All-Cebu Sports awards night at the Terraces of Ayala Cebu. Also belated birthday greetings to Cecilia Paraiso of Asturias, Cebu from Tony Boy Lisondra.To all March birthday celebrants (Pisceans like me), I'm wishing all of you the best of luck.