Davao double champs sa 64th NSBC-BAP

CEBU, Philippines - Sa labing unang higayon sa kasaysayan, nasakmit sa Davao City ang korona sa collegiate ug high school sa bag-o lang natapos nga 64th National Students Basketball Championship didto sa Dagupan City, Pangasinan kaniadtong Marso 3 didto sa CSI Stadia.  

Gipakuratan sa dili kaayo iladong Jose Maria College (JMC)-Davao ang mas lig-on nga Emilio Aguinaldo College (EAC)-Manila sa iskor, 80-78 pinaagi sa overtime aron sakmiton ang korona sa collegiate division samtang ang ilang pambato sa high school nga Assumption College, midaog sab batok sa Malay Boracay High School of Aklan aron langkaton ang korona ug mo-iskor og double championships.

    Igo lang nahimutang sa ika-upat nga pwesto ang pambato sa Sugbo ang University of Cebu (UC) Webmasters kinsa maoy champion sa Cebu Schools Athletic Foundation, Inc. (CESAFI) dihang miyukbo sila sa Lyceum of the Philippines Pirates, 45-63 diin si Arvin Kim Gomez miposa og 19 puntos aron maoy mangu sa ilang team.

Ang 8-0 run sa JMC sa fourth period maoy nahimong yawe sa ilang kadaugan ug human lang nila mabawi ang labaw, 67-64, wala na sila manumbaling pag-usab.

 Si Joshua Adalid maoy napiling MVP sa maong torneyo human siya moposa og 16 puntos. Ang JMC sab maoy morepresentar sa Pilipinas sa umaabot nga 9th Asian University Basketball Championship (AUBC) nga adto ipahigayon sa Kuala Lumpur, Malaysia unya sa buwan sa Hulyo.

Ang maong torneyo gipaluyohan sa CSI Mall, Bestank, Agri-Nurture Inc (ANI), Healthy Options, Sinmag Machine and Universal Dragon Seeds Corporation ug gi-abagan sa Dagupan City government pinagulohan ni Vice-Mayor Belen Fernandez kinsa mao sab ang Basketball Association of the Philippines (BAP) Regional 1 director.

Ang presidente sa BAP nga si Sen. Antonio Trillanes !V maoy mihatag sa tropeyo alang sa champion team.  - BANAT NEWS