Boom Boom nalooy sa kontra

TAGBILARAN CITY, Philippines – Sama sa gilauman yano ra kaayong gidispatsar ni ALA Boxing Gym fighter Rey ‘Boom Boom’ Bautista ang ‘peke’ nga Genaro Garcia kinsa nalup-og sa round 2 sa ilang main event fight niadtong miaging gabii didto sa Carlos P. Garcia Sports Complex.

Nahug og kataw-anan ang giatangan unta nga homecoming fight ni Bautista dihang migawas nga sama sa dili usa ka boksidor si Garcia kinsa nagkapakapa og sukmag batok sa Boholano boxer.

Giparang si Bautista ni Genaro 'Poblanito' Garcia, kinsa adunay rekord nga 38-8, 22KOs ug nakaaway na'g walo ka world champions, apan ang mitaak sa Bohol mao ang kapariha'g ngan nga si Genaro 'Panterita' Garcia nga adunay rekord nga 10 ka daog ug 11 ang pilde.

Tungod sa kaluoy wala dayun buraki og kulata ni Bautista si Garcia kinsa nakatiwas sa round 1.

“Naluoy sad si Boom Boom mao nang amo nalang gitan-aw kun unsaon paghuman ang away,” saysay pa ni ALA chief trainer Edito Villamor.

Pag-abot sa second round misugod pag-atake si Boom Boom ug dali rang nalukapa si Garcia sa makaduha ka higayun sa wala pa hununga ni referee Bruce McTavish ang away sa 1:24 sa maong round.

Tungod sa mga panghitabo, gipahungaw sa liboan ka mga Boholano boxing fans ang ilang kadismaya dihang mipauwan sila og ‘boo’ adihang gi-anunsiyo na nga si Bautista ang midaog.

“Nag-training ko og sakto pero unsaon taman nga dili man mao ang ilang gihatag nga akong kontrahon,” matud pa ni Bautista. “Biktima ra tang tanan dinhi.”

Sa iyang bahin, si ALA Promotions president Michael Aldeguer mitug-an nga dakung kadaot ang nahimo sa maong insidente sa ilang boxing promotion, apan bisan pa niini andam gihapon sila nga makignegosasyon pagbalik didto sa Mexico aron madala ang tinuod nga Genaro Garcia sa nasud.

“Boom Boom’s next fight is on May 26 and one of the plan is to bring the real Genaro Garcia to fight him,” matud pa niya.

Sa laing bahin, ang ALA Promotions mikompirmar nga mohimo sila og legal nga aksyon batok sa kun kinsa man ang responsable sa nahitabong binuang sa ilang promosyon.  - BANAT NEWS