Transmission, Studbolt daog sa Roadstar caging

CEBU, Philippines - Pulos gipanglubong sa Transmission ug Studbolt ang ilang tagsa-tagsa ka kaatbang aron molansang og daog sa pagsugod sa 2nd Roadstar Inter-Company Basketball League niadtong Pebrero 25 didto sa San Carlos Seminary gym sa Mabolo, ning siyudad.

Ang Transmission midemolis sa Alternator sa iskor nga 80-67, samtang ang Studbolt milampurnas sa Axle, 78-66.

Mipahungaw dayon sa ilang kainit ang Transmission sa unang 10 minutos sa duwa ug wala kini mobahar hangtod na sa final period ubos sa giya ni Randy Landiza, kinsa mipabuhagay og 31 puntos aron pangulohan ang opensa. Miabag sab si Manuel Mangaron, kinsa miabuno og 10 puntos.

Ang pilderong Alternator gipangulohan nilang Glen Cuico ug Arnold Ligaray nga nagkumboya og 27 puntos.

Sa laing bahin, sila si Jimboy Magallanes ug Periong Acebes miugkat og 18 ug 16 puntos matag usa aron pangulohan ang Studbolt. Sila si J. Salera ug C. Casas miiskor sab og double figures alang sa Studbolt.

Si Ryan Centillas mipupo og 18 puntos aron pangulohan ang Axle, samtang si Clark Micayabas miligwat og 12 puntos.

Ang tinuig nga liga namugna pinaagi sa paningkamot ni Dreyfuss Ang, ang tag-iya sa Roadstar uban ni commissioner Sherwin Candilada.

Gipaluyohan kini ni Josac Arong ug sa JB Sportswear.

 PUNTOS MATAG USA

Unang duwa:

TRANSMISSION (80) - Landiza 31, Mangaron 10, Labay 8, Canlom 7, Randy 6, Gunayan 6, Tudlasan 2, Artiaga 2, Dimaymay 2, Comamao 2, D. Omamalin 2, R. Omamalin 2

ALTERNATOR (67) - Cuico 14, Ligaray 13, Lubay 11, Abrenica 9, Pabilona 6, Canetan 4, Angcon 4, Masocol 2, Rosal 2, Estrada 2

Ikaduhang duwa:

STUDBULT (78) - Magallanes 18, Acebes 16, Salera 11, Casas 10, Dimaymay 7, Rodrigo 6, Menister 3, Carambias 2, Rosales 2, Lagnason 2, Rondina 1

AXLE (66) - Centillas 18, Micayabas 12, Sacamay 8, Alivo 8, Nombrado 6, Aguelo 4, Nocellas 3, Valendes 3, Dabon 2, Lampitao 2 (BANAT SPORTS)