CEBU, Philippines - Mga bantugang darters sa Pilipinas nga pangulohan ni top-ranked Ian Perez sa Koronadal City ang moanhi dinhi sa Sugbu aron ipakita ang ilang katakus sa 4th Cebu City Mayor's Cup-M. Lhuillier National Darts Open nga gikatakda sa Abril 20-22 didto sa Yayoy's Grill and Resto Bar sa Orchids street sa barangay Capitol Site, ning siyudad.
Gawas ni Perez, lain pang mga notadong players nga nipadayag sab sa ilang partisipasyon sa tulo ka adlaw nga kompetisyon nga gigahinan og P300,000 nga ganting salapi naglakip nilang Jojo Barellano sa Davao City, Lourence Ilagan sa Cainta, Rizal, Boy Gionson sa Navotas, Dodong Nolora sa Butuan, Ding Sumulong sa Pasig, Ricky Mijares sa Quezon City, Boie Parfan III sa Makati, Dixie Ybañez sa Cagayan de Oro ug Andy Villamor sa Butuan City.
Isip host, ang local players mopakita sa ilang labing maayong labok ug dili kini motugot nga ang dili taga-Sugbu ang manghawod sa kompetisyon nga gipasiugdahan sa Cebu City Hall Employees Darts Association (CHEDA) sa pagpangulo ni Bert S. Colong Jr.
Ang Sugbu bidahan sa mga bantugang darters sama nilang Roy Laude, Odong Pamatian, Steve Montenegro, Rodmar Branzuela ug Roniel Pedrosa.
Lain pang mga Sugbuanong kontender naglakip nilang Reyden Colina, Jomar Amerol, Dario Potot, Dicoy Ramirez, Winnie Ocañada, Jerous Ponce ug Alvin Villa.
Mga kategoriya nga tigian sa National Darts Federation of the Philippines (NDFP)-sanctioned event mao ang men's open, ladies, youth ug seniors singles, fixed doubles, classified draw doubles ug triples and Councilor's Cup.
Alang sa registration ug sa dugang pang mga pakisayod kabahin sa kompetisyon, mahimong mokontak ni Bert Colong Jr. sa (032) 516-8593, 0933-5884555 o 0928-7647681, Winnie Ocañada sa 0916-4689819 ug Marvin Orlina sa (02) 372-3541 or 0923-2354651. (BANAT SPORTS)