Kimboy Pineda maoy 'Rider Of The Year'

CEBU, Philippines - Ang garbo sa Tagum City nga si Kimboy Pineda maoy nasentro sa atensiyon dihang siya maoy gibayaw nga ‘2011 Rider of the Year’ ( ROY ) sa MS Motosuit Motocross series awards night sa miaging Sabado didto sa Teatro Casino sa Waterfront-Cebu City Hotel and Casino.

Sa ikaunom nga tuig sa Motocross series nga gipasiugdahan ni MS Motosuit big boss Lou Ornopia, mikulit og kasaysayan si Pineda isip ikaduhang ‘ ROY ’ awardee nga dili gikan sa Cebu .

Unang non-Cebuano rider nga nahimong ROY mao si Irwin Ramas-Uypitching sa Dumaguete.

Si Pineda kinsa nagbangutan pa siya sa kamatayon sa iyang pag-umangkon tungod sa aksidente, midaog sa ROY human siya midominar sa pro ug expert divisions.

Gawas sa iyang pamilya ug mga kahigalaan, nakigsawo usab si Pineda sa iyang kalampusan nga naangkon ngadto sa iyang kauban ug Cebu expert rider nga si Jonjon Adlawan kinsa iyang giisip nga inspirasyon.

Ang overall champion sa matag kategoriya gideterminar basi sa total points nga makolekta sa usa ka rider sud sa siyam ka legs sa torneyo nga gisuportahan sa Petron Philippines .

Laing gihatagan og award mao si John Flores sa intermediate division, three-time peewee champion BJ Pepito, back-to-back executive A titlist Jun Enriquez, perennial open enduro champion Donkey Sanchez, double champion Ray Quirol (beginners production and open enduro), top novice rider Cyril Tariman, executive B champ Roscel Gungob, executive C ruler Jerry Sicad ug mini class crown-holder Jogie Basco.

Sa iyang bahin, si Cebu City Sports Commissioner (CCSC) chairman Edward Hayco, ang guest of honor ug keynote speaker, miawhag ni Ornopia nga buhaton ang tanan aron magpabilin ang maong motocross series alang sa kalambuan sa sports sa Sugbo.   - BANAT NEWS