CEBU, Philippines - Ang Cebu Schools Athletic Foundation, Inc. (CESAFI) juniors MVP nga si Andres Paul Desiderio mipabuto og 27 puntos alang sa Light team nga mipukan sa Dark squad, 94-81 sa Seaoil-National Basketball Training Center (NBTC) Elite League All-Star Game kagahapon didto sa City Sports Club-Cebu (CSCC) gym sa Cebu Business Park.
Sa makausa pa, gipakita na sab ni Desiderio ang iyang katakus tungod kay bisan og natugpa siya sa ika-20 nga dapit sa gihimong All-Star balloting, gibaswat niya ang iyang team, sama sa iyang pagbaswat sa University of the Visayas (UV) Baby Lancers paglangkat sa CESAFI secondary division title.
Si Desiderio mao sab ang instrumento sa kadaugan sa University of the Visayas (UV) Passerelle Team aron kini mahimong National champion sa Under-6 didto sa Baguio City.
Si Dave Wilson Yu, kinsa maoy napiling Most Outstanding Player, mitikdol og 20 puntos, samtang ang iyang teammate sa Sacred Heart School-Ateneo de Cebu nga si Henic Dawn Ochea miamot og 19 puntos.
Ang Light team gipangulohan ni Henry Asilum pinaagi sa iyang 21 puntos, gisundan ni Nelson Peralta sa UV nga adunay 15 puntos ug James Neil Sumayang sa Cebu Eastern College (CEC) Dragons sa iyang 13 puntos. (BANAT SPORTS)