Linayugay na karon sa Mandaue

CEBU, Philippines - Miabot na ang adlaw sa paghukom alang sa Cebuano Mixed Martial Arts (MMA) fighter nga si Ramilo Esfra ug ni   Victor Torre sa Fight Club Bacolod nga magharong sud sa octagon cage karong gabii sa San Mig Strong Ice-Fight Ground Championship (FGC) 3 didto sa Mandaue City Cultural and Sports Complex.

Sila si Esfra ug si Torre nag-abot sa unang higayon atol sa weigh-in kagahapon didto sa Chill Out Bar sa Brgy. Panagdait, Mabolo, ning siyudad.

Si Esfra sa ArcomJukai nga nakapabor sa gidak-on, mitimbang og 148 lbs., bug-at og 20 ka libras batok ni Torre.

"Kun tan-awon mas daku ko niya pero wa gyud ko naghuna-huna nga pabor ko, sa fight night pa gyud nato makita ang tanan," matud pa sa kanhi boksidor. "Pero buhaton gyud nako ang tanan aron modaog."

Sa iyang bahin, ang Brazilian Jiu-jitsu specialist nga si Torre miingon nga dili makaapekto sa away ang daku nilang timbang. "Hindi ko iniisip ang tungkol sa timbang, ang sakin ay bakbakan nalang."

Sa supporting bouts, ang mag-uyoan nga sila si Adamson ug Johnjier Torbiso makigsangka nila ni Alde de Soza ug Danny Diaz Jr.

Mangulo sa undercards mao ang kanhi Muay Thai champion nga si Gino Po, kinsa mohimo sa iyang MMA debut batok ni Rannie Calunsag.

Mokompleto sa fight card mao ang sangka nila ni Pablo Santillan batok Victor Lago, Xander Ymbong batok Leo Rodrigo, Martin Lauron batok Bronzon Diaz, Rambo Galleto   batok Miguel Omboy ug Axel Torbiso batok Benjie Capisnon.  (BANAT SPORTS)