Beermen nilasing ang Heat
MANILA, Philippines - Walong sunod na puntos ang ginawa ni Dalron Johnson sa ikatlong yugto na dinomina ng San Miguel Beer patungo sa madaling 85-62 panalo sa Saigon Heat sa 3rd AirAsia ASEAN Basketball League (ABL) sa Tanh Binh Stadium, Ho Chi Minh City, Vietnam.
Dikitan ang first half at angat lamang ng apat ang Beermen sa halftime, 38-34, pero nakatulong ang pag-iinit ni Johnson na nagbagsak ng 10 puntos bukod pa kina Allan Mangahas at Doug Thomas para sa pagpasok ng huling yugto ay kampante na nilang hawak ang 67-49 panalo.
May 25 puntos, 12 rebounds, 5 steals at 3 assists si Johnson, habang si Thomas ay nag-ambag ng 18 puntos at 10 rebounds.
Sinuklian ni Mangahas ang pagkakasama niya sa starting five ni coach Bobby Ray Parks sa pamamagitan ng 3-of-4 shooting sa tres patungo sa kanyang 11 puntos at 4 steals, habang si Leo Avenido ang nanguna sa bench players sa ibinigay na 16 puntos.
Ito ang ikaapat na panalo sa anim na laro ng Beermen na sunod na tutunguhin ay ang The Mahaka Square sa Indonesia para harapin ang Warriors sa Pebrero 18.
Nalaglag ang Heat sa ikaanim na sunod na pagkatalo at nasayang ang 26 at 23 puntos nina imports Jonathan Jones at Julius Hodge dahil sa patuloy na kawalan ng suporta mula sa ibang kakampi.
Nakasabay ang Heat sa Beermen sa rebounding nang pantayan ang 35 na ginawa ng bisitang koponan pero mayroon lamang silang 5 assists bukod pa sa pagkakaroon ng 28 turnovers. (ATAN)
- Latest
- Trending
