Casimero moilog sa IBF title
CEBU, Philippines - Suwayan ni Pinoy light flyweight contender Johnriel 'Quadro Alas' Casimero pagsakmit sa bakanteng IBF light flyweight title batok ni Argentinian Luis Alberto 'El Mosquito' Lazarte karong adlawa didto sa Club Once Unidos sa Mar del Plata, Buenos Aires, Argentina.
Kini ang ikaduhang pagsuway sa kanhi interim WBO champion nga si Casimero aron mahimong world champion human usab siya mapakyas sa una niyang pagsuway paglabni sa bakus batok ni South African Moruti Mthalane niadtong Marso 26 sa miaging tuig.
Atol sa weigh-in kagahapon, si Casimero mitimbang og 106.7 lbs., samtang si Lazarte mas bug-at og usa ka libra.
Si Casimero, kinsa giubanan sa iyang trainer nga si Pingping Tepora Jr. ug Cebuano international promoter nga si Sammy Gello-ani, masaligon nga molampos ning higayona.
Ang lumad nga taga-Ormoc City nga si Casimero bag-o pa mihaw-as sa iyang impresibo nga comeback fight diin iyang gipakamang sa round 2 si Roemart Sentillas niadtong Oktubre 15, 2011 didto sa Hoops Dome sa Lapu-Lapu City. (BANAT SPORTS)
- Latest
- Trending
