PICPA walay kukaluoy milubong sa Bhutakalz

CEBU, Philippines - Miabante sa finals ang Philippine Institute of Certified Public Accountants (PICPA) ubos sa ilang playmaker nga si Yoly Meso dihang ilang giihaw ang Bhutakalz ni Cris Ang, 90-75 sa nagpadayong Wednesday Club basketball tournament didto sa Capitol Parish gym sa dalan Escario, ning dakbayan.

Nagpaabot na lang karon ang PICPA sa modaog sa duwa tali sa Bhakteenz ug COMELEC aron ilang kontrahon sa kampiyonato.

Gikontrolar sa PICPA ang unang duha ka kuwarter ug pinaagi sa mga puntos nilang Kim Valenzuela ug Art Flores miposte kini og 46-37 nga labaw sa halftime.

Mi-rally ang Bhutakalz didto sa third period diin ilang na-outscore ang PICPA, 17-15 sa tandem nilang Van Ligutan ug Resty Arnaiz aron mosikit, 54-61 pagsugod sa fourth quarter.

Hinuon, wala magpadala sa presyur ang PICPA coach Norwin Honoridez ug mipatuman kini sa ilang hugot nga depensa sa tibuok fourth period alang sa 15 puntos nila nga kadaugan.

Si Valenzuela maoy nangu sa PICPA pinaagi sa iyang 20 puntos, gisundan ni Arjam Bonsucan nga adunay 14 puntos.

Ang pilderong Bhutakalz gipangulohan ni Ligutan nga miposa og 24 puntos, samtang sila si Resty Arnaiz ug Khan Guieb nagkumboya og 29 puntos.

PUNTOS MATAG USA

PICPA (90) - Valenzuela 20, Bonsucan 14, Endrina 9, Flores 8, Tocao 8, Meso 7, Ortiz 6, Talaroc 6, A. Yu 6, F. Yu 6

BHUTAKALZ (75) - Ligutan 24, Arnaiz 16, Guieb 13, Ang 6, Verallo 6, Hernaiz 4, Calipayan 2, Bernido 2, Villarin 2 (BANAT SPORTS)