UE third sa Sinulog Cup

CEBU, Philippines - Mainitong rally sa second half maoy gihimong hinagiban sa   University of the East (UE) Red Warriors pagpukan sa University of the Visayas (UV) Green Lancers, 75-69 ug aron sab pagsakmit sa third place trophy sa M. Lhuillier Kwarta Padala (MLKP) Sinulog Cup kagabii didto sa Cebu Coliseum.

Unang nakabentaha ang Green Lancers dihang nag-wild si Jerome Silva, kinsa mipabuhagay og 15 puntos aron hatagan ang UV Green Lancers og 12 puntos nga abante, 38-26 sa halftimePag-abot sa third period, ang UE sa pagpangulo nilang Roy Sumang ug Lord Casajeros, hinay-hinay nga mikaon labaw hangtod nga nagtabla, 49-all sa katapusang 32 segundos sa maong kuwarter.

Napiangan ang UV sa final period dihang si Silva nakaangkon og injury ug wala na kini makabalik sa playing court nga nakahatag og higayon sa UE pag-ilog sa momentum.

Si Casajeros migara og patuasik sa iyang mga tres lakip na ang usa ka talagsaong four-point play dihang gi-foul siya   ni Abad gikan sa three-point arc.

Ang duha ka free-throw ni Adrian Santos maoy mihatag sa labing dakung labaw sa UE, 66-58 sa katapusang dos minutos sa duwa.

Si Sumang maoy topscorer sa UE pinaagi sa iyang 16 puntos, samtang ang UV gipangulohan nila ni Silva ug Abad sa ilang 17 ug 15 puntos matag usa.  (BANAT SPORTS)