UV Baby Lancers midaog na sa SBP Under-16 championships

CEBU, Philippines - Nakarekober ang University of the Visayas (UV) Baby Lancers gikan sa ilang 91-99 nga kapildihan ngadto sa St. John Institute-Bacolod dihang ilang gipahimungtan ang La Union College of Nursing and Arts (LUCNAS), 84-71 sa 2012 Samahang Basketbol ng Pilipinas (SBP) National Under-16 Championships didto sa University of Baguio (UB) gym sa Baguio City.

Una kining daog sa UV sa maong torneyo ug nagtabla uban sa Holy Child School-Davao, St. Clare ug International School of Better Beginnings (ISBB) sa managsama nilang 1-1 win-loss records.

Ang UV Baby Lancers tuyo nga mokulit sa ilang ikaduhang daog sa ilang pakigbatok sa Holy Child karong alas-10 sa buntag didto sa ECI gym sa Benguet.

Dose ka teams ang niapil sa boys division ug lima sa girls sa tibuok nasud niining grassroots program nga gipasiugdahan sa SBP sa pagpangulo sa ilang presidente ug PLDT-Smart chairman Manny V. Pangilinan ug gipaluyohan MVP Sports Foundation, Philex Mining, Smart, Summit, Energen ug Molten.  (BANAT SPORTS)