Valenzuela hero sa PICPA

CEBU, Philippines - Nahimong bayani si Kim Valenzuela alang sa Philippine Institute of Certified Public Accountants (PICPA) dihang misulod ang iyang follow-up sa kataposang otso segundos aron baswaton ang iyang team ngadto sa kulbahinam nga 89-87 nga kadaugan batok sa Bhakteenz atol sa pagtapos sa Wednesday Club basketball tournament double elimination round didto sa Capitol Parish Gym sa dan Escario, ning dakbayan.

Gitapos sa PICPA ni skipper Yoli Meso ug sa Bhakteenz ni Jonas Asis ang elimination round sa parehong 7-3 nga baraha apan ang PICPA maoy solo leader pinasikad sa winner-over-the-other rule.

Sayong nag-una ang PICPA ug milabaw sila'g tres puntos human sa first period, 28-25 ug usa sa namuntos mao si Valenzuela mismo inabagan ni Art Flores.

Padayong naglabaw ang PICPA sa second quarter ug naghupot og kuatro puntos nga abante, 50-46 atol sa halftime break.

Na-outscore sa PICPA ni coach Norwin Honoridez ang ilang kaatbang, 22-15 sa third period aron moposte'g 11 puntos nga labaw, 72-61 sa third period.

Nainat na unta sa PICPA ang labaw didto sa fourth period pinaagi sa pagtimon ni Yoly Meso kauban ang trio nilang Andre Tocao, Bonel Credo ug Ban Talaroc.

Apan mipabuhagay ang Bhakteenz ug 26-17 nga rally sa fourth period luyo sa paningkamot nilang Rany Cabañero ug Ben Ludovice ug mimugna'g 10 puntos si Asis aron papason ang labaw sa PICPA.

Ang jumpshot ni Cabañero maoy nakatabla sa iskor sa 87-all sa nahibiling 12 segundos apan sa ilang possession, nakapasulod sa iyang follow-up si Valenzuela may otso segundos ang nahibiling oras ug igo sab nahutdan og oras ang Bhakteenz nga daw giugbok nga kandila sa ilang kakurat.

Miposa og 20 puntos si Valenzuela ug midugang si Tocao ug 14 puntos alang sa PICPA samtang sila si Meso, Credo ug Talaroc miamot og 10 puntos matag usa.

Silang Cabañero ug Ludovice maoy nangu sa Bhakteenz sa ilang 27 ug 20 puntos matag usa ug laing duha ka kauban mibahug sab og double figures lakip ni Asis kinsa mihipos og 14 puntos.

Puntos matag usa:

PICPA (89)- Valenzuela 20, Tocao 14, Meso 10, Credo 10, Talaroc 10, J. Bonsucan 7, Flores 6, Alejandre 4, A. Bonsucan 4, Pascua 2, Pañares 2.

BHAKTEENZ (87)- Cabañero 27, Ludovice 20, Ronquillo 16, Asis 14, Sucalit 4, Amora 3, Estrella 3.  - BANAT NEWS