CEBU, Philippines - Inay mabalaka, gamiton hinuon sa Powerade Tigers ang ilang ngil-ad nga kapildehan sa Game-1 isip inspirasyon aron mobawos sa Talk N' Text Tropang Texters karong adlawa sa Game-2 sa ilang “best-of-seven” finals series sa PBA Philippine Cup.
Ang Tigers ug Texters magtiwas karong alas 6:45 sa gabii didto sa Smart Araneta Coliseum.
Bisan pa og naunhan sila sa Texters sa Game-1 niadtong Biyernes, 116-100, nagpabilin gihapon ang dakung salig sa mga players sa Powerade sa ilang kaugalingon nga maoy mokampiyon.
Si Powerade coach Bo Perasol nakasabot nga lisud ang pagdaog sa Game-1 tungod sa pagkawala sa presensya sa iyang No.1 rookie nga si JV Casio kinsa nagpaalim sa injury, apan posibling moduwa kini karon aron tabangan ang iyang koponan.
"We rested JV in Game One to give him time to heal his injury. It's just one game in a seven-game series," matud pa ni Perasol sa PBA.ph.
Ang usa sa mga leading candidate sa “Best Player of the Conference” award nga si Gary David nagkanayon usab nga tungod sa wala pagduwa ni Casio, naugtas siya pagsagubang sa depensa sa Texters.
"We felt right there in the absence of JV. He's among the team's top options offensively. Since he wasn't there, Talk 'N Text was really able to concentrate on me," matud pa niya. - BANAT NEWS