Cobras abante sa finals
CEBU, Philippines - Midugkat og 17 puntos ang swingman nga si Jessmar Villahermosa aron pangulohan ang, 76-67, nga kadaugan sa Southwestern University (SWU) Cobras batok sa University of the Visayas (UV) Green Lancers kagabii sa M.Lhuillier Kwarta-Padala (MLKP) Sinulog Cup diha sa Cebu Coliseum.
Ang Cobras segurado na og luna sa finals karong gabii human nila giharus ang tulo ka duwa sa elimination. Magpaabot sila sa resulta sa duwa tali sa University of the East (UE) Red Warriors ug San Beda Red Lions.
Gawas ni Villahermosa, laing duha ka Cobras nga mirehistro og double-figures mao sila si Ian Saladaga sa iyang 14 puntos ug Cameroonian nga si Mendjana Mbala nga midunol og 10 puntos.
Gikan sa dos puntos nga labaw sa first-half, 36-34, init nga scoring run ang gilusad sa SWU sa third period. Ang tres ni Villahermosa sa katapusang 22 segundos maoy mihatag og otso puntos nga labaw sa Cobras human sa kuwarter, 57-49.
Wala natapos didto ang pagbangis sa Cobras human nila gitukod ang labing daku nilang labaw sa duwa, 63-51 sa katapusang 8:20 sa duwa.
Gikan didto wala na lingia pa sa SWU ang UV kinsa mitapos sa elimination nga way bisan usa ka daog.
Si Jerome Silva maoy leading scorer sa UV sa iyang 13 puntos, samtang si Cris Perolino miiskor og 12 puntos. - BANAT NEWS
- Latest
- Trending
