Noblefranca misaad og knockout

CEBU, Philippines - Misaad si Renante 'Limbas'  Noblefranca sa Yaw-Yan ArDigma og paspas ug brutal nga knockout sa iyang sangka batok ni Brazilian Jiu-jitsu specialist Jonathan Sumugat sa Universal Reality Combat Championship (URCC) Cebu 7 - ‘Dominate’ karong Biyernes didto sa Cebu International Convention Center (CICC) sa Mandaue City.

Ang undefeated kickboxing sensation nga si Noblefranca mopakita sa iyang katakus sa striking batok ni 2010 Pan Asia BrazilianJiu-jitsu Open gold medalist Sumugat sa Davao City.

"Maayo man siya sa ground mao akong dad-on sa stand-up," matud pa ni Noblefranca. "Labaw ko sa striking ug ako suwayan nga ako siyang i-knockout sa round 1."

Ang 19-anyos nga si Noblefranca, kinsa beterano na sa 28 ka mga kickboxing fight miiskor usab og usa ka impresibong first round TKO nga kadaugan batok ni Jessie Tambiling sa URCC VI sa miaging tuig.

Sa iyang bahin si Yaw-Yan Cebu ArDigma CEO/Founder and Vis-Mis director Master Benigno 'Ekin' R. Caniga, Jr. mipadayag sa iyang kompiyansa dili lang ngadto ni Noblefranca, apan lakip sa laing duha niya ka fighters nga moaway sa maong fight card.

Si Geronimo Etac ug Roel Rosauro mosuway'g kulit og daog batok sa tagsa-tagsa nila ka kaatbang.

Suwayan ni Etac pag-ilog sa URCC Visayas title nga gihuptan ni Victor Torre sa Bacolod City, samtang si Rosauro makig-"rematch" ni Arnel Ylanan sa Bullet Fighting System sa Mandaue City.

Sa laing bahin, ang mga Cebuano MMA fans makasaksi sa labing unang higayun sa sangka ni No. 1 local MMA fighter Eduard 'Landslide' Folayang batok ni Brazilian Wadson 'Knockout' Teixeira.  (BANAT NEWS)