Kenyans maoy midominar

CEBU, Philippines - Wa pasayloa sa mga Kenyan runners ang 3rd Cebu City Marathon dihang sila maoy midominar sa 42k full marathon ug 21k half marathon kagahapon didto sa Cebu IT Park.

Naghari sa 42k run ang Kenyan first timer nga si Richard Mutisya kinsa mitapos sa lumba sud sa duha ka oras, 28 minutos ug 41 segundos. Gisundan siya sa iyang kababayan nga si David Kipuang sa oras nga 2:28.41, samtang mipahiluna sa ikatulong dapit si Frederick Mathiu sa oras nga 2:31.49.

Sa women’s division, ang Kenyan nga si Joan Jeruto mao usab ang mikampiyon sa oras nga 3:13.28 batok taga-Davao nga si Cynthia Jaro sa ikaduhang dapit sa oras nga 3:14.00.

Laing Kenyan nga si Susan Jemutai ang mipwesto sa ikatulong luna sa oras nga 3:23.17.

Kenyan usab nga si Samson Tuwei ang midaog sa 21k half marathon sa oras nga 1:31.10, samtang iyang mga kauban nga sila si Willy Rutich ug Eliud Kipkening maoy migawas nga second ug third placer.

Bugtong Filipino nga misakmit og kampiyonato mao si Mary Grace delos Santos sa 21k female run batok sa mga Kenyans nga sila si Kimchmbas ug Stephanie Pumatong nga maoy mipwesto sa ikaduha ug ikatulong dapit.

Nakahigayun hinuon ang mga Cebuano sa 5k category dihang mikampiyon sila si Joebert Carolini ug Lovely Fe Andrin.  - BANAT NEWS