Knicks daog batok Nets, 92-83, Cavs daog vs. Pistons

CEBU, Philippines - Miposa og 17 puntos si Carmelo Anthony sulod sa tulo ka quarters ug ang rookie nga si Iman Shumpert midugang og 16 puntos aron baswaton ang New York Knicks ngadto sa 92-83 nga kadaugan batok sa New Jersey Nets kaniadtong Sabado atol sa ilang pre-season game didto sa Newark, New Jersey.

Hinoon, si Renaldo Balkman maoy nangu sa Knicks sa iyang 20 puntos ug si Amare Stoudemire midugang og 10 puntos bisa'g gihamok sa iyang 3-of-11 field shooting apan nakatabang sab ang ilang mga reserves lakip ni Shumpert, kinsa maoy first-round pick gikan sa Georgia Tech ug iyang gipuhalan sa abilidad ang ilang starting guards nga si Tony Douglas ug Landry Fields.

Si Tyson Chandler kinsa midebut sa Knicks human siya kuha-a gikan sa Dallas Mavericks nga iyang gitabangan nga molangkat ug korona sa NBA sa miaging season alang sa usa ka sign-and-trade deal, mi-iskor lang og kuatro puntos ug may upat sab ka rebounds. Nakahimo sab siya'g duha ka steals ug duha ka blockshots sulod lang sa 27 minutos.

Silang Brook Lopez ug Anthony Morrow parehong mibahug og 15 puntos alang sa Nets apan ang ilang All-Star guard nga si Deron Williams igo lang nakahimo og 4 of 12 field shooting ug mis-iskor og nuybe puntos.

Sa laing bahin, impresibo kaayo ang gipakitang lihok sa no. 1 draft nga si Kyrie Irving kinsa mibahug og 21 puntos alang sa Cleveland Cavalier kinsa naka-ipsot batok sa Detroit Pistons sa iskor, 91-87 niadtong Biyernes sa labing unang exhibition game ni Irving sa NBA didto sa Auburn Hills, Michigan.

Si Irving maoy top pick sa NBA karong tuiga apan wala ilista isip starter. Medyo dili pa kaayo preparado ang duha ka teams ug daghan pang gimbuhaton nga angay himoon sa dili pa sugdan ang ilang duwa karong Disyembre 26.

Atol sa halftime, ang Cleveland mihimo’g 33 percent shooting ug may 14 ka turnovers.

Ang Detroit sa laing bahin, may 30 percent shooting ug may 10 ka turnovers. Nabalikan nuon sa ilang duwa ang duha ka teams sa mosunod nga duha ka quarters apan dili kadto matawag nga maanindot ang ilang gipakitang duwa.

Si Brandon Knight, ang ikaduhang point guard nga nakuha sa draft sunod kang Irving, miamot og nuybe puntos alang sa Pistons. (BANAT NEWS)