Martus misidlak sa scrabblefest
CEBU, Philippines - Garbo sa Sugbu nga si Engr. Theodoro Martus Jr., ang numero unong scrabble player sa nasud, mipahiluna sa ika-15 nga dapit sa tinuig nga Causeway Challenge didto sa Johor Bahru, Malaysia sa miaging weekend.
Usa kini ka dakung kalampusan ni Martus Jr., kinsa ika-25 sa miaging tuig.
Si Martus, alumnus sa University of the Visayas (UV), hapit masulod sa top five sa 48 ka partisipante gikan sa 15 ka mga nasud.
Wala siya kasugakod ug napilde sa katapusan niyang tulo ka duwa.
Miyukbo siya ngadto sa no. 1 player sa Singapore nga si Hubert Wee nga maoy nakahanaw sa kahigayonan ni Martus nga malakip sa top 8.
Ang nakaayo, kay si Martus gigantihan og usa ka espesyal nga scrabble board pagtapos sa torneyo human nidaog og highest score game 702 puntos.
Atol sa duwa, si Martus miiskor og 175 puntos sa pulong nga "Dioxanes" ug "Shambled" alang sa 102 puntos, "Overtire" para sa 82 puntos ug "Swifted" alang sa 85 puntos.
Mikompleto sa top 10 finishers naglakip nilang Pakorn Nemitrmansuk, Nigel Richards, Hubert Wee, Komol Panyasoponlert, Jakkrit Klaphajone, Conrad BB, Thacha Koowirat, Marut Siriwangso, Marlon Prudencio ug Cheah Siu Hean. (BANAT SPORTS)
- Latest
- Trending
