Boom Boom tumbahon sa round 6

CEBU, Philippines - Misaad si Mexican knockout artist Miguel Mendoza nga iyang tumbahon si ALA superstar Rey 'Boom Boom' Bautista atol unya sa ilang sangka.

Ang 27-anyos nga  Mehikano mosuway pag-ilog sa IBF International featherweight title ni Bautista sa main event sa "Pinoy Pride X" karong Sabado didto sa Brgy. Gun-ob sa Hoops Dome sa Lapu-Lapu City.

Atol sa iyang media appearance kagahapon didto sa Maya Mexican Restaurant, giangkon ni Mendoza nga usa ka lisud nga sangka ang iyang atubangon batok ni Bautista, apan gipadayag niya   nga andam usab siya nga mohimo og upset.

Si Mendoza nabantog nga delikadong "knockout artist" sa iyang perpektong 17-0 record, tanan gikan sa knockout.

"I hope he (Bautista) would not run away from me," matud pa ni Mendoza.

"I came to Cebu for a knockout and I’m confident that I will knock him out probably at the sixth

round."

Laraw usab ni Mendoza nga gub-on ang damgo ni Bautista nga makuha ang laing world title shot o ang usa ka dream match batok ni Mexican superstar Daniel Ponce De Leon.

Gawas sa pag-ilog sa bakus gusto usab ni Mendoza nga makakuha og simpatiya gikan sa mga Cebuano fans human sa away.

"I plan to bring back the belt to Mexico and to win some Cebuano boxing fans after the fight," dugang pa niya.

Karong hapon si Mendoza uban ang laing undefeated Mexican nga si Marcos 'Geraldito' Cardenas mopahigayon og public sparring didto sa Event Center sa SM City-Cebu.  - BANAT NEWS