MANILA, Philippines - Pupuntiryahin ng Boracay Rhum ang ikaapat na sunod na panalo sa pagbangga sa Big Chill sa pagpapatuloy ng PBA D-League Aspirants’s Cup ngayon sa San Juan gym.
Nakabawi na ang Waves mula sa 1-2 start at ngayon ay nasa ikaapat na puwesto sa 11-koponang liga.
Galing sa 72-68 panalo ang Waves sa DUB Unlimited kamakalawa upang manatilng matibay ang paghahabol ng koponan sa puwesto sa quarterfinals.
Kung manalo pa ay tatatag ang pagtangan sa ikaapat na puwesto ng tropang hawak ni coach Lawrence Chongson.
“Hindi pa kami nakakatiyak ng puwesto sa quarterfinals kaya kailangang magpatuloy ang aming magandang inilalaro,” ani coach Lawrence Chongson.
Ang Big Chill na may 4-3 baraha ay mangangailangan din ng panalo para mapabilang sa apat na koponan na maglalaro sa quarterfinals.
Unang bakbakan ay sa pagitan ng RnW Pacific Pipes laban sa Cobra Energy Drink sa ganap na alas-2 ng hapon.