Vertek palaban sa MM National Finals
MANILA, Philippines - Kabuuang 460 top runners, kasama rito ang mga foreign long distance experts, ang mag-aagawan para sa championship title at top purse na P 300,000 sa 35th National Milo Marathon Finals sa Linggo sa SM Mall of Asia sa Pasay City.
Nakapasa ang 410 men at 50 women sa age group qualifying time ng 42.195k at 21k elimination legs na inilunsad sa 17 major cities na tinampukan ng mga pinakamatatandang 21k qualifiers mula sa Cebu na sina Rening Ylaya (76-anyos) at Shiela Colmenares (56-anyos).
Inaasahang makikipaglaban ang mga local bets kontra sa mga Ethiopian at Kenyans.
Idedepensa ni 3-time National MILO Marathon titlist Eduardo Buenavista, nabigong manalo ng gintong medalya sa nakaraang 26th Southeast Asian Games sa Indonesia bunga ng dehydration, ang kanyang korona.
Ang 33-anyos na si Buenavista ng Sto. Niño, South Cotabato ay ang kasalukuyang record holder ng MILO Marathon mula sa kanyang bilis na 2:18:53.
Makakasabayan ni Buenavista si Ethiopian runner at first time Milo Marathon participant Mikael Tesfaye, nagsumite ng pinakamabilis na tiyempong 1:09:31 sa 21-km elimination leg sa Cebu City.
Si two-time National MILO Marathon Queen Jho-Ann Banayag ang record holder sa women’s division sa kanyang 2:48:06 na kanyang itinala sa 2006 National Milo Marathon Finals.
- Latest
- Trending
