Kontrang Boom Boom moabot karon
CEBU, Philippines - Gitakdang moabot karong adlawa sa Sugbo ang Mexican knockout specialist nga si Miguel Mendoza kinsa maoy sangkaon ni ALA Gym superstar Rey “Boom Boom” Bautista.
Si Mendoza musuway pag-ilog sa IBF International featherweight title ni Bautista karong Sabado didto sa Hoops Dome sa Lapu-lapu City.
Ang Mehikano uban sa iyang trainer nga si Fregoso Medrano moabot karong gabii luwan ang Cebu Pacific flight 5J 579 didto sa Mactan Cebu International Airport.
Wa gilimod sa kampo ni Bautista nga risgu sa karera sa ALA fighter ang pakigsangka ni Mendoza kinsa adunay perpektong record nga 17 ka daog pulos gikan sa knockout nga wala milapas sa fifth round.
Sa interview aning tigbalita atol sa public work-out niadtong miaging gabii didto sa SM City Cebu, si ALA Promotions president Michael Aldeguer nagkanayon nga nagdepende sa ipakita ni Bautista kun makuha ba niini ang usa ka world title shot batok ni Australian Billy Dib.
“Well, depende jud karon Sabado if he gets a world title shot or a dream rematch with Daniel Ponce De Leon,” matud pa ni Aldeguer. “Atong tan-awon ani iyang chin kay kusug pud ni si Mendoza and let's see if how Boom Boom withhold if he gets hit.”
Ugmang adlawa si Mendoza miatubang sa mga sakop sa Cebu Sports Media sa usa ka press conference didto sa Maya Mexican Restaurant sa Banilad. - BANAT NEWS
- Latest
- Trending
