Padugang ra lagi sa pusta! Mao kini ang akong nakita sa gikahinamang Pacquiao-Mayweather superfight. Kay lagi ‘money talks.’
Ang promoter nga si Bob Arum nagkapuliki karon og pangita'g mga potensyal nga investors alang sa maong sangka aron masigurong si eight-weight division champion Manny Pacquiao ug Floyd Mayweather Jr. parehong makabulsa og malabong tag-100 milyones dolyares sa ilang panagbangga.
Dili pa lang dugay migawas ang mga balitang si Arum maoy babag sa Pacquiao-Mayweather fight kay lagi mas giduso niini ang 4th rematch ni Pacquiao ug Juan Manuel Marquez, kinsa gipilde na sa Pinoy sa kontrobersyal nga majority decision niadtong Nobiyembre 12.
Apan mas bug-at ang timbang sa kuwartang makuha kun si Mayweather ang sunod nga atubangon sa Pinoy boxing icon kumparar kang Marquez nga tataw unya kaayong langawon lang. Kay kun kang Marquez gud daw ‘mangyawat’ lang si Arum sa sensilyong kitaon, apan kang Mayweather, syurbol nga binandol nga salapi ang makuha. Ang nakapanindot gud ani kay human sa away ni Pacquiao ug Marquez kalit milugwa si Mayweather nga nagpanikad og hagit kang Pacman.
Nakakita ba kaha siya og buslot o weakness ni Pacquiao sa katapusang away niini? Wala ta kahibalo basin aduna na siya’y formula nga nahunahunaan unsaon si Pacquiao. Si Marquez gikonsiderar lang nga medyo ubos kang Mayweather kun sa counter-punching ang hisgutan, apan naglisod na si Pacquiao, nganong dili man suwayan ni Mayweather aron sab makita ang katag dili ba?
Gawas pa, dungog ug sa dakung premyo nga wala pa maabot sa ubang mga boksidor sa kasaysayan sa maong sports ang iyang maangkon. Siya pa usab unya ang labing unang boksidor nga moputol sa 15-winning streak ni Pacquiao nga mao ang labing unang boksidor sa kalibotan nga nahimong kampiyon sa walo ka dibisyon.
Ang bati nga performance ni Pacquiao tinuyo man o dili sa uwahi niining away daw nahimong paon aron mogawas si Mayweather. Nanghagit kining andam na siyang mopirma basta sundon ang drug testing nga iyang gipangayo.
Matud pa, medyo duna nay nakab-ot nga kompromiso ang duha ka kampo labot niini ug dili na gyud kapugngang mahitabo ang ilang panag-abot. Ang nakanindot ani ug unta matinuod nga aduna gyu'y mahitabong "rematch" bisan kinsa pay modaog sa duha. Gani trilogy pa siguro.
Siguro mao na kini ang grand finale sa karera sa duha sa boksing. Si kinsa ang tinud-anay kanilang pound-for-pound king.
* * *
PAGTULON-AN: Sa bangga sa sapa ug sa dakung bato, ang sapa kanunay nga modaog. Apan dili kini tungod sa kusog kun dili sa hinay apan kanunay nga sulog.
* * *
PASALAMAT. Nagpasalamat og daku ang mga opisyales sa Alpha Sigma Omega-Sigma Chi Gamma International Collegiate Service Fraternity and Sorority sa mga brothers ug sisters nga midonar sa "Tsinelas ni Dodong ug Inday" project nga nahimo nang panaad nga programa sa SIOUX alang sa mga kabus nga kabataan.