CEBU, Philippines - Pabiling undefeated ang garbo sa SOMA Fighting Club nga si Joerick “The Viper” Rivera human niya gipaundang sa round two si Jonjier “The Dangerous” Torbiso sa Durex Dragons sa main event sa “Fight Ground Championships” sa miaging gabii didto sa San Roque Sports Complex.
Milusad og atake si Rivera gamit ang iyang mga nagpungasi nga leg kicks sa wala pa niya dumuga si Torbiso ngadto sa ground aron tapuson ang beteranong fighter pinaagi sa usa ka guillotine choke sa katapusang minuto sa second round.
Sa maong kadaugan si Rivera mipalambo sa iyang Mixed Martial Arts (MMA) ngadto sa 4-0, samtang si Torbiso nakahiagum sa iyang ikatulong pilde sud sa unom ka away.
Sa supporting main event, ang team mate ni Rivera nga si James “Spider” Serenio mipukan ni sa taga-Mindanao ug Malawi Fighting System founder nga si Ali “The Grappler” Malawi sa first round.
Usa ka makusug nga right overhand ang gigamit ni Serenio aron mapatumba si Malawi sa wala pa niya kini dabo-dabohi sa ground.
Sa laing duwa, si Romelo “Arcom” Espra mipahunong ni Mark “The Terminator” Araneta sa second round, samtang si Leo Gaerlan sa Yaw-Yan Musang mituok ni Junrey Soquite sa first round.
Midaog usab ang duha ka fighter sa Yaw-Yan ArDigma nga sila si Mark “Buhawi” Revalde ug Renan “Limbas” Noblefranca batok sa tagsa-tagsa nga kaatbang.
Ang kanhi Universal Reality Combat Championship (URCC) fighter nga si Revalde midaog pinaagi sa rare naked choke batok ni John Edu Torbiso, samtang si Noblefranca mi-TKO ni Jimwill Nainge. (BANAT NEWS)