MANILA, Philippines - Kinuha ng host University of Perpetual Help System Dalta ang ikalawang sunod na panalo matapos pabagsakin ang Mapua, 25-1, 25-17, 25-9, sa pagpapatuloy kahapon ng 87th NCAA volleyball sa Ninoy Aquino Stadium.
Sina Janice Jabar, Norie Jane Diaz, Sandra delos Santos, Honey Royse Tubino at Angelique Dionela ang mga nagtulung-tulong para isunod ang Lady Cardinals sa Lyceum na naunang tinalo ng Lady Altas.
Ang 25-1 iskor ang masasabing pinakamalaki sa isang set at patunay ito sa kahandaan ng Lady Altas sa planong kampeonato sa kanilang dibisyon.
Dahil kontrolado ang laban, naipasok pa ng Lady Altas ang kanilang reserves para sa mahalagang exposures na magagamit ng koponan sa mga susunod nilang laban.
Ang pagkatalo ng Mapua ay kanilang ikalawang sunod matapos dumapa rin sa Arellano sa kanilang unang asignatura.
Nakapanggulat naman ang Emilio Aguinaldo College nang manalo sila sa juniors at women’s matches laban sa mas malakas na College of St. Benilde.
Humirit ng 25-8, 25-11, 25-14, panalo ang Brigadiers laban sa Greenies sa juniors play habang naitakas ng Lady Generals ang 21-25, 25-20, 25-15, 23-25, 15-12 panalo sa Lady Blazers.
Binawi naman ng Blazers ang magkasunod na kabiguan nang manalo sa Generals sa limang sets, 25-15, 15-25, 25-23, 22-25, 15-9.