Caniga gipasigarbo sa UC

CEBU, Philippines - Giila sa University of Cebu (UC) ang dakung kalampusan nga nakuha sa usa sa ilang tinun-an ug International Mixed Martial Arts (MMA) grand champion nga si Johnlery Ian Caniga.

Si Caniga mihatag og dungog sa nasud human midaog isip grand champion sa Navarro’s Mixed Martial Arts Championship niadtong Nobiyembre 5 didto sa Pacifica sa California, USA.

Uban sa iyang arnis instructor nga si Grandmaster Max Caballes, si Caniga mihimo og courtesy call ngadto ni UC president Atty. Augusto Go, kinsa midayeg sa abilidad sa 20-anyos nga martial artist.

Ang anak ni Yaw-Yan ArDigma founder Master Benigno 'Ekin' Caniga Jr., usa ka full scholar sa UC diin siya nagtungha sa kursong BS Criminology.

Nagmaya usab si Go tungod kay sa kadaugan ni Caniga, miabot na sa international scene ang malampusong programa sa UC sa sports.

Batok sa 150 ka langyaw'ng martial artists, si Caniga mikampiyon sa tulo ka martial arts disciplines nga naglakip sa stick fighting (arnis), Brazilian-jitsu (Gi) ug Muay Thai. Ikatulo siya sa Brazilian Jiu-jitsu (No Gi).

Isip grand champion, si Caniga midawat og usa ka life-size trophy ug duha ka 22-carat gold rings ug plaque.

Plano usab karon sa Team Caniga nga molarga paingon sa kaulohan aron idunol ngadto mismo ni President Benigno Aquino III ang presidential trophy.  (BANAT SPORTS)