Mayor Rama mibuhi'g 10 ka triples

CEBU, Philippines - Mihimo og kasikas si Cebu City Mayor Mike Rama, kinsa mipauwan og 10 ka three-pointers aron pangulohan ang Executives squad paglubong sa DMDP, 95-70 sa Cebu City Hall Sportsfest Inter-Department basketball tournament didto sa San Nicolas Complex sa Sawang Calero, ning siyudad.

Sa kinatibuk-an, si Mayor Rama mi-iskor og 34 puntos, samtang laing duha niya ka teammates ang mirehistro sab og double figures.

Unang miabante ang DMDP ug gitapos nila ang unang 10 minutos sa duwa sa iskor nga 14-13. Apan ang Executives daling nakarekober ug milusad kini'g 22-12 run aron ilogon ang labaw sa halftime, 35-26.

Sa pagpangulo ni Mayor Rama, miburot pa ang ilang labaw ngadto sa 22 puntos sa third period, 64-42 nga maoy nakapaluya sa naghangak nga DMDP.

Miaksiyon unta og gukod ang DMDP, apan pakyas kini pag-ilog sa daog kay nahubsan na kini sa oras.

Puntos Matag Usa

EXECUTIVES (95) - Rama 34, Baldago 12, Bacuro 11, Mongaya 7, Tabar 7, Cenas 7, Minola 6, Borres 4, Reyes 4, Babatid 2

DMDP (70) - Perez 19, Villaver 14, Luces 10, Cartalla 8, Cañete 6, Luces 5 (BANAT NEWS)