Caniga makigkita ni PNoy

CEBU, Philippines - Human mihatag og dungog sa nasud isip labing unang Pinoy nga nahimong Grand Champion sa usa ka international Martial Arts tournament, ang Sugbuanong Mixed Martial Arts fighter nga si Johnlery 'Ian' Caniga mangayo og suporta alang sa iyang laraw nga personal nga modunol sa Presidential Trophy ngadto ni President Benigno Aquino III.

Si Caniga nahimong Grand Champion sa Navarro’s Mixed Martial Arts Championship niadtong Nobiyembre 5 didto sa Pacifica, California.

Ang 20-anyos nga BS Criminology student sa University of Cebu (UC) nakadawat og cash prize, life-size trophy, plaque ug duha ka gold rings human sa malampuson niyang kampaniya didto sa Estados Unidos.

Apan ang Team Caniga walay igong pundo alang sa ilang paglarga didto sa kaulohan aron ikahatag ngadto ni President Aquino ang Presidential Trophy.

 "Ang amo lang mahatod namo ang trophy sa president, kay daku gyud og dungog ang nahatag ni Ian kay gawas nga na-grand champion siya, mibilib usab ang mga foreigners sa among disiplina ug maayong pamatasan," matud pa ni arnis instructor Grandmaster Max Caballes atol sa press conference sa miaging gabii sa Yaw-Yan ArDigma Gym.

Nagtuo usab si Caballes nga human sa kalampusan ni Caniga didto sa US, mas daghan pa unyang Cebuano martial arts practitioners ang moduwa ug modala sa bandera sa nasud sa mga international tournaments.  (BANAT SPORTS)