Mendoza tunok sa karera ni Bautista

CEBU, Philippines - Dakung risgo sa karera ni ALA superstar Rey 'Boom Boom' Bautista ang pakigsangka niya ni undefeated knockout artist Miguel Angel Mendoza karong Disyembre 10 didto sa Hoops Dome sa Lapu-Lapu City.

Si ALA Gym founder Antonio 'Bidoy' Aldeguer nagkanayon nga dakung sugal alang kanila ang pagparang ni Bautista ngadto ni Mendoza, kinsa adunay perpektong 17 ka daog, tanan gikan sa knockout.

Kini na ang labing lisud nga sangka ni Bautista nga midaog sa katapusang lima niya ka away, ang labing uwahi mao ang kontrobersiyal nga seventh-round technical decision batok ni Heriberto Ruiz niadtong Hunyo.

"This is really a big risk for us because Mendoza is a very dangerous opponent for Boom Boom, but I have faith in my fighter," matud pa ni Aldeguer. "He (Mendoza) is a knockout puncher, let’s just see if he can also take Boom Boom’s punches."

Nagtuo si Aldeguer nga ang kadaugan ni Bautista batok ni Mendoza maoy yawi alang sa mas dagku pa unyang sangka alang sa Boholano fighter sama sa dream rematch batok ni Daniel Ponce De Leon o usa ka world title bout batok ni IBF champion Billy Dib sa Australia.

 "A win for Boom Boom will open up opportunity for a more   bigger fight that will be done here in the Philippines," dugang pa niya.

Gawas ni Bautista, laing ALA boxers nga sila si Rocky 'Road Warrior' Fuentes ug Genesis 'Azukal' Servania, ang mopakita sab og aksiyon batok sa tagsa-tagsa nilang langyaw'ng mga kaatbang. (BANAT SPORTS)