CEBU, Philippines - Pito sa 15 ka bouts sa pagbukas sa 2011 Batang Pinoy Visayas Leg Boxing Tournament ang dali kaayong nagdaog dihang nagpakita og maayong labok ang mga batan-ong boksidor gikan sa nagkalain-laing lugar sa Kabisay-an didto sa Robinson’s Place sa Dumaguete City, Negros Oriental.
Gisugdan kini sa kadaugan ni John Rey Catalogo sa Sipalay City, kinsa midaog sa puntos batok ni Mike Gian Duoma sa Don Salvador Benedicto sa antweight division.
Mas nagpakita og katakus si John Paul Pane sa host Dumaguete City dihang midaog kini pinaagi sa RSC (referee stopped contest) batok ni Fernando Tayab sa bantamweight division. Si John Smith Gonzales sa Leyte Province midaog sab pinaagi sa puntos batok sa Sugbuanong si Ramil Casanares.
Sa sangka ubos sa minimumweight division, si Junille Olivares sa Cebu City midaog pinaagi sa puntos batok kang Regiemel Siabo sa Don Salvador Benedicto, midaog sab pinaagi sa puntos si Roberto Romano sa Calbayog City batok kang Najorji Augustine Chinedo sa Leyte Province ug si Marco Pomar sa Talisay City midaog pinaagi sa pagpaundang sa second round ni Benie Aday sa Sipalay City.
Sa mosquitoweight division, sila si Gerald Bogtong sa Calbayog City, Jason Ladrillo sa Leyte Province ug Juli Rey Villahermosa sa Maasin City pulos midaog pinaagi sa puntos sa tagsa-tagsa nila ka away.
Sa lightpaperweight division, si Archie Moyani sa Sipalay City midaog pinaagi sa RSC sa second round batok ni Jegmart Longakit sa Cebu City, gipaundang sab sa second round ni Orville King Olaivar sa Tagbilaran City ang kontrang si Daryl Victoriano sa Dumaguete City. Si Mario Bautista sa Himalayan City nagkinahanglan la'g usa ka round sa pagpaundang ni James Ygonia sa Bayawan City ug gipakgang ni Jason Becong sa Maasin City si Lee Mar Mianon sa Talisay City pinaagi sa RSC sa second round.
Sa paperweight division, si Hipolito Banal sa Cebu City midaog pinaagi sa puntos batok kang Wildo Ken Ignacio sa Leyte Province ug gipahunong ni Glin Mark Inojales sa Tagbilaran City ang iyang kontra nga si Alvin España sa Bayawan City pinaagi sa first round RSC.
Ang semifinal bouts himuon karong adlawa sa alas 3 sa hapon.
Ang Batang Pinoy Visayas Leg Boxing Tournament gidumala nilang Victorio Policarpio ug Billy Famero sa Amateur Boxing, Referees, Judges and Technical Officials Association of the Philippines (ABREJAP). Gipasiugdahan kini sa Amateur Boxing Association of Negros Oriental (ABANO). - (BANAT NEWS)