Pajo, dumlog abante sa final four
CEBU, Philippines - Mi-iskor og managlahing daog ang barangay Pajo sa Lapu-Lapu City ug ang barangay Dumlog sa Talisay City aron moabante ngadto sa Final Four sa Handy Fix National Barangay Championship kagahapon didto sa Vicente Sotto Memorial Gym sa barangay Punta Princesa, ning siyudad.
Ang Brgy. Pajo mitagak sa Brgy. Poblacion Pardo human mo-iskor og 71-66 nga kadaugan.
Tulo ka players sa Brgy. Pajo ang mibahog og double figures sa pagpangulo ni kanhi UV Lancers Harlow Chad Villanil, kinsa mihipos og 19 puntos, gisundan ni Allan Gersala nga adunay 13 puntos ug Gil Wagas nga miamot og 11 puntos.
Si Jomar Mentederamos maoy nangulo sa Brgy. Poblacion, Pardo pinaagi sa iyang 12 puntos.
Sa laing tinaktakay nga duwa, ang Brgy. Dumlog wala magpaapekto sa gipakitang kakusog ug kaabtik sa Brgy. Pulpogan, Consolacion ug ila usab kining gitaktak human mo-iskor og 76-66 nga kadaugan.
Si UV Lancer Arvie Cabañero, kinsa miposa og 15 puntos maoy nangu sa Dumlog, samtang si Reggie Racaza miabuno og 13 puntos ug si Jemar dela Peña mitampo og 10 puntos.
Ang Pulpogan gipangulohan nilang Ernesto Tudtud, kinsa mibahog og 17 puntos ug si Emiben Agea miabuno og 16 puntos.
Ang national finals himuon karong Nobiyembre 12-13 diha sa Capitol Parish gym sa dalan Escario, ning siyudad. (BANAT SPORTS)
- Latest
- Trending
